Israel sipaite'n Iran beihna chhan let ngei an tiam
Iran-in kar liam ta Inrinnia drone leh missile tam tham tak hmanga Israel a beih chungchangah, ram hrang hrangte'n buaina nasa zawk a chhuak zui lohna tura Iran bei let lo leh, inbengdai turin Israel ngen hlawm mah se, Israel sipaite chuan chhan let ngei an tiam.
Israel war cabinet chuan Iran beihna hi a hun takah chhan a ni dawn tih a lo sawi tawh a, mahse, an chhan let hun tur erawh an la sawi lo. Iran-in a beih hnu lawk, Pathianni khan war cabinet meeting neih nghal a ni a, darkar 24 pawh a liam hmain, Thawhṭanni khan prime minister Benjamin Netanyahu chuan war cabinet meeting vawi hnihna hi a ko leh nghal a ni.
Iran beihna avang hian nunna chân an awm lo a, thil tihchhiat lian tham pawh a awm lo. Iran drone leh missile kah chhuah tam zawk hi Israel leh a thawhpui ramte'n an lo dang thei a ni. An ramin chhiatna nasa tak tuar phah lo mah se, hetianga Israel rama missile, cruise missile leh drone kah luh a nih hi chhan let a ni dawn tih Israel military chief of staff, Lt. Gen. Herzi Halevi chuan a sawi. Halevi hian Thawhṭanni khan Iran-in drone leh missile kah chhuah ṭhenkhatin a fuh avanga tlema zawng a tihchhiat, an ram chhim lama Nevatim Airbase a tlawh a, sipaite nen inkawmna hun an hmang bawk. Airbase infrastructure hi tlem a chhe ve deuh a, mahse, hnathawh pawh engmah a buai phah lo a, aircraft te pawh dan pangngai angin kal chhuahtir vek an ni.
Iran-in a ralthuam la hman ngai loh hmanah a vau let
Israel sipai hotuin Iran beihna an chhan let ngei tur thu a sawi hnuah, Iran chuan Israel hi vaukhan nghalin, Israel-in a bei let a nih vaih chuan second rei lote chhunga an chhan let ve nghal tur thu leh, an ralthuam la hman ngai lohte pawh an hman tur thu an sawi.
Iran senior official, Abolfazi Amoui chuan Israel-in a beih pawha lo do let turin kawng hrang hrangin an inbuatsaih a, an ralthuam la hman chhuah ngai lohte pawh a lo buatsaih lawk tih a sawi.
Iran ram chhungah Israel-in a beih let hlauhthawnna a lian hle a, indona a thlen chuan an ram economy dinhmun ṭha lo tak chu a chhe lehzual dawn tiin, a bikin middle leh lower-income class lamin an hlauthawng hle. Ram dang mi awmte pawhin Iran hi an chhuahsan nasa tawh hle. Iran mi, an ram inrelbawl dan duh lotute chuan online lamah Israel thlawpna lam pawh an post nasa hle a, hei vang hian Islamic Revolutionary Guard Corps-a intelligence unit chuan Pathianni khan Iran social media user, Israel thlawpna lam post-te chu warning a pe a ni.