Myanmar : Sorkar laka helte'n rocket hmangin mi pali kap hlum

Myanmar sipai sorkar dodaltu pawl chuan Thawhṭanni khan an ram laili laia Pyin Oo Lwin khua chu rocket hmangin an bei a, mi pali thiin mi dang 12-in hliam an tuar bawk niin sorkar official-te chuan an sawi. .

Sipai sorkar hian dodalna a tawh nasat em avangin Myanmar chhunga rorel zel tur hian a dinhmun pawh a ṭha tawh lo hle nia sawi a ni.

Sorkar dotu People's Defence Force (PDF) hian Pathianni tlai khan rocket 11 lai an kap chhuak a, heng rocket kah chhuahte hian damdawi in, sakhaw hmun pawimawh leh hotel-te a fuh niin sipai sorkar chuan a tarlang. Nunna chân zinga mi pahnih hi Buddhist sakhaw puithiam an nih thu an tarlang tel bawk.

PDF-te'n an beih, Pyin Oo Lwin khua hi Mandalay bula awm niin, Myanmar Defence Services Academy awmna a ni bawk. Sipai thupuangtu Zaw Min Tun chuan hliam tuar zingah hian Defence Services Academy-a awm mek mi pathum an tel tih a sawi. PDF lam chuan sipai sorkarin civil mite pawh bitum tel tia a puhna chu phain, Defence Services Academy chauh an beih thu an sawi thung.

Myanmar-a mipui sorkar paihthlaa sipai sorkarin ramchhung rorelna fawng a vawn hnuah sipai sorkarna duh lo helpawlte chu sorkar lakah helin Myanmar sipai sorkar nen hian an indo ta a ni. Myanmar ramchhunga helpawl hrang hrang, sipai sorkar laka helte chuan an dinhmun siam ṭha zelin sorkar chuan ramchhung hmun tak tak a hloh tawh a ni. Kar liam ta khan Thailand-Myanmar ramri bula insumdawn tawnna hmun pawimawh tak aṭangin sipaite chu helte hian an lo nawr chhuak tawh a ni. Kum 2021 aṭanga tihluihnaa Myanmar awp bettu sipai sorkar dinhmun hian hniam lam a pan zel.