Ruah leh ṭek vangin Pakistan-ah state of emergency puang Afghanistan-ah mi 33 an thi

Pakistan chhimthlang lam hmun hrang hrangah ni thum liam ta chhung khan ruah sur nasa leh ṭek tla avangin mi 49-in nunna an chan a, hei vang hianPakistan sorkar chuan state of emergency a puang.

Ruah sur nasa avang hian Pakistan hmung hrang hrangah harsatna a thleng a, ṭek tlain a den hlum zingah hian loneitu ṭhenkhat, an loa hnathawka awm laite pawh an tel a ni.

Pakistan hmarthlang lam leh Punjab province velah chuan ruah sur nasa avangin in tam tak a chhe bawk. Provincial disaster management authority thupuangtu, Arfan Kathia chuan Punjab bikah mi 21 an thih tawh thu sawiin, tun karah hian ruah tam zawk sur tura beisei a la nih thu a sawi bawk. Hmarthlang lam bial, Afghanistan ramri, Khyber Pakhtunkhwa-a disaster management authority thupuangtu chuan mitthi 21 an neih tawh thu a tarlang ve bawk. Pakistan khawpui Islamabad-ah pawhin chhiatna thleng hi tuarin, Baluchistan province-ah mi pasarihin nunna an chan phah tawh a ni.

Pakistan-in chhiat an tawh chungchangah hian prime minister Shehbaz Sharif chuan TV kaltlangin thuneitute hnenah chhawmdawlna leh ṭanpuina pe chhuak tura a hriattir tawh thu a puang a, Pakistan tui hnar a ṭhat phah dawn thu a sawi bawk.

Ruah sur nasa hi Pakistan bakah hian Pakistan ṭhenawm ram, Afghanistan pawhin an tuar a, thuneitute chuan hriat theih chinah ni thum chhungin mi 33 an thi tawh niin an tarlang. Mi 33 an thih bakah hian hliam tuar mi 27 an awm bawk. Taliban sorkara state ministry for natural disaster management thupuangtu, Abdullah Janan Saiq chuan, in 600 chuang tihchhiat a nih thu leh ran vulh 200 chuang an chan thu te, kawngpui kilometre 85 aia thui leh lo neihna ram eng emaw zat tihchhiat a nih thu a sawi. Saiq hian Afghanistan thuneitute chuan chhungkaw 23,000 tan ṭanpuina an pek chhuah tawh thu te, an ram chhung province 34 zinga province 20-ah chuan tuilian thawk thut ang chi a thlen thu te a sawi tel bawk.