US-in Iran hrek belh a rel

US chuan Iran-in Israel a beih chungchangah Iran missile leh drone program-te hrek belhna turin ruahmanna an siam thu an puang a, US chuan a ṭhian leh thawhpui ram hrang hrangte pawh Iran hrekna kawnga thlawp tur hian a sawm bawk.

Iran missile leh drone program hrek belhna tur chungchang hi US National Security Advisor, Jake Sullivan chuan Thawhlehni khan a puang a ni. Hemi hma hian Treasury Secretary, Janet Yellen leh European Union foreign policy chief, Josep Borrell-te chuan Iran-in Israel a beih avanga hremna tur chungchang chu rel mek a nih thu leh, hma la tura an inbuatsaih thu an lo sawi tawh bawk. Yellen hian Iran chet dan chu an chhehvela awmte tana him lo a nih thu leh indona nasa zawk chawk chhuak thei a nih thu te, Iran nawr hniam tura an theihna zawng zawnga hmalak an inhuam thu te sawiin, Borrell pawhin dinhmun hlauhawma awm reng ai chuan inven mai a ṭhat thute a sawi a ni.

Sullivan chuan,"US-in Iran hrek belhna tur hi a duang mek a, a bikin missile leh drone program te hrekna tur a ngaihtuah a ni. A rang thei ang bera hmalak a ni ang," tiin a puang. US hmalakna chu US thawhpui leh ṭhian ṭha ramte'n thlawpa, an zawm ve a beisei thu a sawi bawk a, Iran hrekna tura ruahmanna thar an siamte chu Iran-in sipai chakna hmanga tha an thawh ṭhin nawr behna atan leh thunun an nih theih nan a ṭul tih a tarlang.

US hian tun hma aṭangin Iran chet dan thlithlai leh nawr hniam tur hian sum leh pai hmanga hrekna a lo kalpui fo tawh a, a ram ang mai bakah Iran nena inzawmna nei mimal leh pawl 600 chuang zet chu firfiaka chetna leh pawikhawihna chi hrang hrang kaihhnawihah an lakah hrekna a lo siam tawh a ni.