Khaw lum lutuk avangin Suu Kyi-i jail aṭangin a inah sawn

Myanmar civil leader, sipai sorkarin Naypyidaw jail-a a tantir chu an ramah khua a lum chhoh zel avang leh, a hriselna a ṭhat tawk loh bawk avangin jail aṭangin a chenna inah hren chhunzawm tura sawn a ni.

Sipai sorkar thupuangtu, major general Zaw Min Tun chuan Thawhlehni khan Suu Kyi leh civil sorkar paihthlak taka president Win Myint bakah, kum upa zual deuhte chu jail aṭang hian hmun dangah sawn an ni tih a sawi. Zaw Min Tun chuan, "Khua a lum chhoh tak em avangin, Aung San Suu Kyi tan chauh pawh ni lo, hriselna lam enkawl leh fimkhur ngai zual, a bikin kum upa zawkte chu khaw lum lutuk lak aṭanga theih anga ven an nih theih dan tur kan ngaihtuah a ni," a ti.

Kum 78 mi, Suu Kyi hi kum 2021-a Myanmar sipaite'n a kaihhruai civil sorkar an paihthlak hnuah khan hren zui a ni a, thubuai eng emaw zatah thiam loh chantir a ni tawh bawk. A thubuai hrang hrangah hian kum 27 jail tang tura hrem a ni a, president hlui Win Myint pawh hi kum riat tang tura hrem a ni. Sipaiin sorkarna an chan hnuah, sipai rorelna dodaltute chuan lungawi lohna nasa takin an lantir a, April 12 thleng khan an zinga mi 20,351 chu man an ni tawh. Tualchhung buaina thleng avang hian civil mi 4,800 vel an thi tawh bawk a ni.

Myanmar meteorological department chuan Thawhlehni khan Naypyidaw khaw lum lam hi 39 degree Celsius niin, nimin khan 41 degree Celsium a tling chho tawh niin an sawi. Khaw lum hian zual lam a la pan zel dawn nia sawi a ni bawk.

Myanmar sipai sorkar chuan nimin vek khan an ram new year festival lawmna pualin tang 3,300 chhuah an ni dawn tih a puang.