Ruah sur nasa avangin Dubai khawpui a buai

United Arab Emirates (UAE) khawpui pawimawh tak Dubai chu Thawhlehni khan ruah sur nasa takin a tibuai a, ruah sur hian khawpui chhungah tuilian thlenin nunphung a khaihlak phah hle.

Khaw awm dan a mumal theih loh avangin Dubai International Airport chuan thlawhtheihna ṭum turte chu hmun danga ṭum turin hriattirna a tichhuak a ni. Khawpui chhunga mall hrang hrangte chu tuiin a chim a, kawngpuiah tuilian avanga lirthei tangkhang ṭhahnem tak an awm bawk. UAE-ah thlipui tleh tur leh rial tla awm tur anga sawi lawk a nih bawk avangin nimin khan ram pumah sikul chawlh puan a ni.

Dubai hi thlaler a nih avangin ruah hi a dawng tlem hle. Thawhlehnia ruah sur hi kum khat leh a chanve chhunga ruah tla an dawn zat vel a tling a ni. Ruah sur tur avang hian sorkar chuan mipuite chu in lama tawmhim turin a hriattir lawk a, nimin thleng khan sorkar hnathawkte chu in lam aṭanga hna thawh phalsak an ni bawk.

UAE bakah hian Middle-east ram dang Bahrain leh Qatar hmun ṭhenkhat chu ruah tlak tam avang hian an buai ve bawk. Bahrain hian ruah tla tam tak vangin tuilian an tuar ve mek a, Oman-ah thlipui tleh leh ruah sur nasa avanga chhiatna thlengah mi 18-in nunna an chân tawh bawk a ni.