US-in bin Laden beih tur Pakistan a hrilh duh lo : Leon Panetta

US Central Intelligene Agency (CIA) director hlui, Leon Panetta chuan kum nga kalta-a US Navy Seal commando-ten al-Qaida firfiak pawl hotu, Osama bin Laden chenna in, Pakistan-a mi bei a, an thah chungchang kha Pakistan sorkar an hriattir lawk duh lo tih a sawi.

Kum 2011, May 2 khan US Navy Seal commando-te hian Abbottabad, Pakistan-a bin Laden-a in chu luhkhungin an kaphlum a ni. Mahse US chuan Pakistan chu a rin tawk loh avangin a chet tum dan hi a hrilh lawk lo a ni.

Leon Panetta chuan, "Pakistan hian firfiak pawl ṭhenkhatte inzawmna ṭha tak a neihpui avangin hriatthiam a har a, eng ang chinah nge rin ngam tur tih a hriatthiam loh a ni" a ti. Bin Laden-a laka beihpui an thlaknaah hian Pakistan chu thawhpui an duh hle a, mahse rin ngam a ni dawn nge dawn lo tih zawhna tam tak a awm avangin President chuan hrilh loh a duh ta zawk a ni, a ti.

US defence secretary hlui ni bawk, Leon Panetta chuan Pakistan nena an inlaichinna siamṭhat pawh hmabak ko tak a ni tih a sawi a, hemi rual hian kawng tam takah thawhdunna ṭha erawh an nei tih a sawi.