NKorea hotupa-in inneih leh mitthi vui a khap

North Korea rama rorellai, Workers' Party chuan kum 36 chhunga a ṭum khatna turin an ram khawpui, Pyongyang-ah Zirtawpni aṭang hian Congress an hmang dawn a, Congress neih chhung hian an ram hotu lu ber, Kim Jong-un chuan inneih leh mitthi vui bakah punkhawmna lian dang siam a khap.

Workers' Party Congress neih chhung hian Pyongyang khawpui luh leh chhuah khap tlat a ni dawn bawk niin UK Independent chuan a tarlang. Congress neih tur hi Kum Jong-un-a thuneihna chan hnua an neih ṭum khatna tur a ni. An neih hnuhnun ber chu kum 1980, Kim Jong-un-a pa, Kim Jong-il a dam laiin a ni.

North Korea state newspaper, Rodong Sinmun chuan Congress neih tur chu khawvelin a ngaihven tur thil ropui a ni tih a sawi a, he hun hi Workers' Party bakah an ram hruaitu hlui, Kim Il Sung leh Kim Jong Il-te zahna hlanna tur a ni, a ti. An hun hman tur kimchang erawh a tarlang tel lo.

South Korea intelligence official-te chuan Congress-ah hian Kim Jong-un hian nuclear test tura thupek a tihchhuah an rin thu a sawi, a hma aṭangin NKorea hi nuclear test thei turin a lo inpuahchah tawh a ni, an ti.