Republican presidential nominee tur Donald Trump Ted Cruz-an campaign a titawp

November thlaa US President thlanna neih turah Donald Trump chu Republican party candidate a ni dawn ta.

Donald Trump hian Indiana primary election-ah hnehna chang lehin, Republican nominee a ni thei dawn ta a ni. Candidate zinga mi Ted Cruz chuan Indiana primary-ah hnehna a chan zawh loh avangin president candidate chuh tura a beihna a titawp a, hei vang hian Trump hian primary inthlan tur eng emaw zat la awm aṭangin Republican nominee ni tura delegate neih ngai zat 1,237 chu hmu thei dawn ta a ni.

Ted Cruz-a campaigner-te chuan Indiana primary-ah hian chet ṭhat a, Donald Trump dan theih an beisei hle. Mahse hnehna an chan zawh tak loh avangin campaign chhunzawm zel an tum ta lo a ni. Cruz chuan, "Hnehna chan ngei tumin kan theihtawpin kan bei a, mahse mipuite chuan kawng dang an thlang ta zawk a ni" a ti. Rilru na tak chungin campaign a titawp ta tih a sawi.

July thlaa party convention neih hunah Donald Trump hi President inthlanna neih turah party nominee atan puan a ni ang. Kum 1952 hnu lama politics lama tawnhriat la nei lo nonimee hmasa ber a ni dawn a ni.

Republican president candidate inchuhnaah hian Ohio Governor John Kasich chuan la beih chhunzawm zel a tum thu a sawi a, mahse Trump nen hian delegate an neih zat a inthlauh em avangin a umphak beiseina a tlem hle. Trump hian delegate 1,047 a nei tawh a, Kasich hian 153 chauh a nei thung. Ted Cruz hian a campaign a tihtawp hian delegate 565 a nei hman a ni.

Indiana primary-a hnehna a chan hnua thu a sawiah, Donald Trump chuan America chu ram ropuiah an siam leh dawn tih a sawi. Ted Cruz fakna thu pawh sawiin, khingpui hautak leh fing tak a nih tih a sawi. Campaign laiin Cruz leh Trump-te hi ṭawngkamin an inbei na thei hle a ni.

Trump chuan Democratic candidate ni tura rinkai, Hillary Clinton chu a bei nghal a, "Hillary Clinton-i hi kan hmachhawn zel dawn a ni. President ṭha tak a ni dawn lo a, insumdawn tawnna lam pawh engmah hriat a nei lo a ni" a ti.

Republican National Committee Chairman Reince Priebus pawhin Trump chu an party nominee a ni dawn tih sawiin, President thlan hunah Hillary Clinton-i chu hneh ngei tura an party chu lungrual taka an thawhho a ngai tih a sawi.

Indiana primary election-a Demo-cractic lamah Hillary Clinton-i hi a chak zo lo a, Senator Bernie Sanders a hneh lo a ni. Sanders hian Democrats nonimee ni tura beih zel a tum tih a sawi.