Myanmar-a Rohingya camp-ah kangmei chhuak

Myanmar khawthlang lam, Rakhine state-a Rohingya Muslim-te chenna camp-a mi 2,000 chenna in chu Thawhlehni khan a kang ral.

Rohingya Muslim-te hi kum 2012-a Buddhist nena an intihbuai hnu khan mi tam tak chu tlanchhiain camp-ah an la khawsa zui reng a ni. Thawhlehni-a kangmei chhuahna hi state khawpui, Sittwe bula Bawdupa camp a ni a, eirawngbawlna thuk ṭanga chhuak nia hriat a ni.

Khua a ro bakah thli a tleh tel avangin kangmei chhuak hi a darh chak hle a, ṭhelh theih loh khawpin a kang zui ta a ni. United Nations Office for the Coordination of Humanitarian Affairs (OCHA) chuan kangmei chhuak vang hian mi 14-in hliam an tuar niin a sawi a, mi 2,000 vel chenna in 440 chu bungrua engmah chuh hman lohin a kangral tih a tarlang bawk.

Kum li kal taa Rohingya Muslim leh Buddhist-te inkara buaina chhuak vanga tlanchhia, mi 140,000 vel chu an in lamah kir ngam loin camp-ah an la khawsa zui zel a, an khawsak pawh a harsa hle. Myanmar-a Buddhist kalfawr ho chuan Rohinyga-te hi 'Bengali' tia sawiin, dan loa Bangladesh aṭanga an rama lut niin an ngai a, an ngai thei lo hle a ni. Mahse Rohingya zinga tam tak chu an thlahtute aṭanga Myanmar rama khawsa tawh an ni a, mahse heti chung hian enhran an tawk hle a, ram mipuite hnena hamṭhatna pek ṭhin tam tak pawh an dawng ve lo a ni.