America-ah Zika virus

Pan American Health Organization (PAHO) chuan America rama mi maktaduai 500-te chu Zika virus kai mai hlauhawm dinhmunah an ding niin a sawi.

PAHO Zika incident manager, Sylvain Aldighieri chuan, "Kum 15 kalta chhunga Dengue leh Chikungunya virus lenna ram te chu Zika virus len mai hlauhawmna ramah an tel a ni" a ti. Hei vang hian Middle America aṭanga Latin America, Argentina hmarlam leh Carribean ram thlengin Zika hri hi leng thei reng a nih thu a sawi.

Aldighieri chuan America-a Zika virus vei hmuhna ram chu ram 37 an tling tawh tih a sawi a, heng zinga ram panga-ah hian he virus-in a thlen nia hriat, nau piang thar zinga rualbanlo, pianphung pangngai aia lu te zawk an awm thu report a awm tawh tih a sawi bawk.

Zika vaccine hi tun thlengin a la awm lo a, US National Institute of Allergy and Infectious Disease chuan September thla hian Zika vaccine chu enchhin an tum tih a sawi. Director Anthony Fauci chuan an vaccine siam chu kum 2017 kumtir lamah a ṭha tawk em tih an hre thei dawn tih a sawi.

Zika virus hi thosi chi khat, Aedes species seh aṭanga kai theih a ni. He hri veite chuan khawsik, thak, ruh chuktuah na neiin an mitte a sen a, a vei zingah thihpui erawh an la tam lo hle.