Canada-ah ram kang vangin emergency puang

Canada rama Alberta state-a Fort McMurray khuaah ram kang nasa tak avangin khaw chhung mi tam tak chu hmun him lamah an insawnchhuak tawh a, he khuaah hian emergency puan nghal a ni.

Thli a tleh tel avangin ram kang hi a darh chak hle a, Pathianni khan khawchhung hi man kaiin chenna in 1,600 chuang a kang chhe tawh a, he khuaa cheng mi 80,000 chuang zet chu an tlanchhe tawh. Fort McMrray-a commercial flight lut leh chhuak pawh tihtawp lailawk vek a ni bawk.

Alberta state minister of munici-pal affairs, Danielle Larivee chuan khaw chhungah kangmei hi a la chhuak chhunzawm reng tih sawiin, kangṭhelhtu mi 250 ten theihtawp chhuahin ṭhelh mit tumin an bei mek tih a sawi.

Thuneitute chuan kangmei chhuak vanga thi leh hliam an awm an hriat loh thu an sawi a, mahse khawpui chhuahsan tuma tlanchhuak car pakhat chu chesualin thi an awm niin an tarlang.

Alberta Premier Rachel Notley chuan thlawhtheihna hmangin kangmei chhuakin khawpui chhung a tihchhiatte dante a enkual a, khawpuia cheng mi 10,000 vel chu hmarlamah an tlanchhe tih sawiin, heng mite awmna tur camp hi siam a nih thu a sawi. Fort McMurray khua aṭanga tlanchhuak tam zawk hian chhim lama Edmonton khua leh a hmun dang an pan a, official-te chuan khaw chhung mite hi chhim lamah insaseng vek se an duh tih an sawi.

Canada Prime Minister Justin Trudeau chuan kangmei chhuakin thil a tihchhiat dan chu hriatchian theih a la ni lo tih sawiin, khawpui a tihchhiat dan chu ngaihtuah thiam mai pawh a har zawk a ni, a ti.