Kasich-an campaign titawp ve leh ta

US President thlanna neih tura Republican candidate nih tuma chuh zinga Donald Trump-a khingpui la awmchhun, Ohio Governor John Kasich chuan a campaign a tihtawp thu a puang ve leh ta.

Party candidate nih tuma an in elnaah, Kasich hian Ohio inthlanah chauh hnehna a chang chungin, candidate zinga Trump-a khing rei ber a ni. Indiana primary election neih hunah Donald Trump-a hnaih bertu, Ted Cruz chuan hnehna a chan zawh tak loh avangin president candidate chuh a tumna chu a tihtawp thu a puang a, Kasich erawh chuan a tawp thlenga beih a tum thu a puang. Mahse a tuk, Nilaini khan campaign a tihtawp thu hi a puang ve leh ta tho a ni.

Trump chuan Kasich-a chuan thutlukna dik tak a siam nia a ngaih thu sawiin, Ohio tana mi ṭangkai tak a nih ngei a rin thu a sawi. Candidate dangte aiin Ohio Governor nen hian an inkar boruak pawh a ṭha zawk nia sawiin, Trump chuan a vice president atana a duh zingah pawh a tel thu a sawi.

Republican party president candidate a nih theihna tura Indiana primary election-a hnehna an chan khan, Donald Trump-a camp chuan thusawi tura a kalchhua laiin Rolling Stones band hla, 'Start Me Up' an lo play a, hei hian Rolling Stones member-te a ti lungawi lo hle a, an hla-te hmang tawh lo turin Trump-a camp chu an hriattir nghal.

Rolling Stones thupuangtu chuan, "Trump-a campaign na atan hian Rolling Stones chuan an hla hman phalna an pe lo a ni" a ti. Trump hian a campaign-naah hian 'Start Me Up' hla bakah, 'You Can't Always Get What You Want' leh 'Brown Sugar' tihte a lo hmang tel tawh a ni.