Ram kang tuarte thlawhtheihna hmangin thiar chhuak

Canada rama ram kangin Alberta province-a Fort Mc-Murray khua a tuam tel avangin khawchhunga cheng mi tam tak chu hmun him lamah an tlanchhe tawh a, hmar lama tlanchhia mi 8,000 vel chu thlawhtheihna hmangin thiar chhuah an ni bawk.

Official-te chuan Fort McMurray khua aṭang tlanchhia zinga a tam ber chu an khaw chhim lama Edmonton leh Calgary lamah an kal tih sawiin, hmarlamah mi tam vak lo an kal bawk. Thuneitute chuan hmarlam panna kawngpui awmchhun chu nimin khan zawh ngamin a him tawh niin an sawi a, hmar lama tlanchhia mi 17,000 vel chu hmun him lamah thiarchhuah an la ni leh dawn tih an sawi.

Fort McMurray khawchhunga cheng, mi 88,000 chuang chu an tlanchhuak vek tawh a, Alberta Premier Rachel Notley chuan an khaw lama kir leh tur chuan hun ala duh rei dawn tih a hrilh.

Alberta province-a ram kang hian ram, square km 850-a zau a kang kai tawh a, kangṭhelhtu za tel chuan theihtawp chhuahin an ṭhelh a, helicopter leh air tanker-te hman a ni bawk.

Kang mei chhuak hian chennain 1,600 chuang leh building pawimawh dang eng emaw zat a kang ral tawh a, khawpui chhim lam chu a la kang chhunzawm reng a ni. Khawpui aṭanga hmarlama tlanchhiate chu oil sands work camp-ah an khawsa a, heng mite hi sipai thlawhtheihna hmanga thiar chhuah niin mi 8,000 chu hruaichhuah an ni tawh.

Premier Notley chuan hmarlama tlanchhiate chu a rang thei anga chhim lama hruai an tum tih a sawi a, Fort McMurray chu awm zui zelna atana a him loh thu a sawi.