Turkey PM a bang dawn

Turkey Prime Minister Ahmet Davutoglu chu President Recepe Tayyip Erdogan nena an inkar boruak ṭha lo avangin PM a nihna aṭangin a bang dawn.

President leh PM inkar boruak hi thla eng emaw zat kalta aṭang kha a ṭha tawh lo nia sawi a ni a, hruaitu pahnihte hi ramchhung leh foreign policy chungchangah an inrem thei lo a ni. An inkara harsatna awmte hi siamṭhat tum mah se, an inrem theih tak loh avangin President hian PM hi bang turin a ngen nia sawi a ni.

PM hi Doha-a Turkish military base hawnga a kal laiin, rorellai AK Party chuan local leh provincial party hruaitu ruat tura thuneihna a neihte a lo titawp sak a, hei hian boruak a tichhe zual a ni. A hnu lawkah President Erdogan thlawptu blog pakhatah Davutoglu hi PM a nihna anga a thawh ṭhat tawk loh dan hrang hrangte tarlan a ni bawk.

Ningani khan AK party central executive neih a ni a, hemi hnua news conference a neihah Davutoglu chuan PM a nihna aṭanga a ban tur thu hi a sawi ta a ni.