Biden-a'n ni 100 chhungin mi mtd 50 vaccine pek tum
US President-elect Joe Biden chuan nakkum January 20-a US President office a luah ṭan aṭanga ni 100 chhungin Covid-19 vaccine chu mi maktaduai 50 hnenah pek a tum.
Covid vaccine jection hi mi pakhatin vawi hnih zel, ni 21 danah a lak a ngai dawn a, hei vang hian mi maktaduai 50 hnenah vaccine pek tur atan hian dose maktaduai 100 a ngai dawn a ni.
Joe Biden chuan office a luah tirh lam hun eng emaw chen chu an rama hripui leng chu an titawp nghal mai thei dawn lo a, mahse hri leng dinhmun erawh a thlak danglam ngei dawn tih a sawi. A hmaa a health team turte a puan ṭumin, Biden hian President atana lakluh a nih aṭanga ni 100 chhung chu hmaituamna hmang vek turin America mipuite a lo ngen tawh bawk. Ni 100 chhung vek hian hripui leng vanga an rama school khar tam zawk chu hawn hman a tiam bawk.
US regulator, Food and Drug Administration (FDA) chuan Pfizer/BiotNTech Covid vaccine chu 95% a rintlak nia sawiin a lo nemnghet tawh a, emergency-a hman turin a pawm thuai rin a ni. Vawiinah thutlukna siam turin an meeting ang.
Covid-19 laka veng pumhlum turin vaccine hi dose hnih pek a ngai dawn a, mahse dose khatna hian he hri hi 89% velin a veng thei dawn nia sawi a ni. Hetih lai hian vaccine injenction lak hian side effect, vung, rei vak loh chauh phah, lu na leh tha na te pawh a siam thei nia sawi a ni.
US biotech firm Moderna pawhin a vaccine siam chu a rintlak tawk niin a sawi bawk a, Krismas hmain FDA pawmpuina hi an hmuh hman ngei an beisei.