Israel-in a ram venhimna chungchangah amah ngeiin thutlukna a siam ang : PM Netanyahu
Israel prime minister Benjamin Netanyahu chuan Iran-in drone leh missile hmanga Israel an beih chungchanga inbengdai tur leh chhang let lo tura khawthlang ramte'n an ngen mek karah, Israel ram venhimna chungchanga thutlukna chu Israel ngeiin a siam dawn a ni, a ti.
Iran beihna hi Israel-in a chhan let chuan Middle East-ah indona nasa tak a chhuah chhoh hlauhthawnna a lian hle a, hei vang hian United States, European Union leh G7 group ramte chuan Israel-in a beih let tur dan theihna turte an ngaithuah a, Iran pawh na zawka hrekna siam an tum thu an puang a ni.
Prime Minister Netanyahu hian Nilaini khan Israel leh Iran inkara indona chhuak thei mai tur ven dan ngaihtuaha an ram tlawhtu, Germany leh Britain foreign minister-te a hmu a, Annalena Baerbock leh David Cameron-te chungah lawmthu a sawi rualin, "Chiang taka ka sawi duh chu, thutlukna chu keimahni ngeiin kan siam a. Israel chuan a ram venhimna tura pawimawhte chu a ti vek dawn a ni," tiin a sawi.
Hetih lai hian Israel sipai hotu, Herzi Halevi chuan Iran beihna hi an chhang let ngei dawn tih a lo sawi tawh a, sipai thupuangtu Daniel Hagari pawhin Iran chu hremna pe loin an chhuah dawn lo tih a sawi ve bawk. Mahse Iran hi eng hunah nge an chhan let dawn tih erawh an sawi lang lo.
Israel chhawmdawlna pek tur pass thuai turin ngen
US president Joe Biden chuan Congress hnenah indona hmachhawn mek, Israel leh Ukraine tana chhawmdawlna pek tur chu pass thuai turin a ngen.
President Biden chuan Israel leh Ukraine chuan an ram veng thei mah se, US puihnaah an innghat nasa a, a bikin ralthuam chungchangah an innghat hle a ni tiin, tun hi an tana hun pawimawh a ni tiin tun hnaia Iran-in Israel a beih leh, Russia-in Ukraine a beih chungchang a sawi.
Congress hnena ngenna a siamah Biden chuan Iran hian Israel nuai bo a tum a ni a ti a,"Iran sorkar chuan kumkhua atana Israel tihchhiat a, map aṭanga Juda ram awmchhun chu thai bo a tum a ni," a ti. "Iran sorkar hian kum tam tak Hezbollah, Hamas leh helpawl dangte'n Israel an beih ṭhinna chu puiin October 7-a Hamas chet dan rawng tak pawh kha a thlawp a, tunah chuan amah ngeiin direct-in Israel a bei ta a ni," a ti. Iran hian Israel a bei chhunzawm zel a nih chuan US pawh hnuhluh a ni ngei dawn tih a sawi bawk.
"Israel hi Middle East-a kan thawhpui ram nghet ber a ni. A invenna tihchhiat a nih a, Iran-in a beih chhunzawm zel laia lo thlir reng chu thil ni thei a ni dawn lo. Hetiang thil a thlen lohna turin Israel air defence thuam chakin sipaite chhawmdawlna kan pe thei a, an defence-te chu ralthuam an mamawh ang zat nen, inpeih renga an awm a ngai a ni" a ti.
US-in Rafah-a beihpui thlak tur a pawmpui
US chuan Israel-in Iran beihna a chhang let dawn lo a nih chuan, Gaza Strip-a Rafah-a beihpui a thlakna tur chu a pawmpui nia sawi a ni.
Israel sipaite'n Rafah khawpuia Hamas laka beihpui thlak an tum chu US chuan a thlawp loh thu a lo sawi fo tawh a, kaltlangpui lo turin pawhin a lo ngen tawh a ni. Mahse kar liam taa Iran-in drone leh missile hmanga Israel a beih hnuah, Israel-in a chhang let a nih chuan buaina nasa tak a chhuah dawn avangin, Iran a beih ai chuan Rafah-a beihpui thlak chu a pawmpui ta zawk niin a lang.
Israel senior official chuan,"Prime minister Benjamin Netanyahu chuan Rafah-a sipaite'n Hamas ho lakah beihpui an thlakna tur atan America pawmpuina a hmu thei ta a ni," a ti. Nimin zing lam khan Israel Defence Force (IDF) chuan Gaza Strip leh Egypt inrina bul vela hmun eng emaw zatah airstrike an nei zui a ni.
Iran-in military parade nei
Israel nena indo mai thei dinhmuna ding mek, Iran chuan Nilaini khan Annual Army Day hmangin, an ram khawpui Tehran-ah military parade an nei a, an ralthuam hrang hrangte an pho lang.
Iran president, Ebrahoim Raisi chuan Israel vauin, Israel aṭanga tlemte pawha beihna an tawk a nih vaih chuan, na takin an chhang let nghal dawn tih a sawi. Israel nena inzawmna siam ramte chu a dem thu sawiin, heng ramte hian an mipuite hma ngeiah zak takin siam an ni, a ti. UAE, Bahrain leh Morocco-te chuan kum 2020 khan US hmalakna hnuaiah Israel nena inlaichinna ṭha siamna tur, Abraham Accords an lo ziak tawh a ni. Kum 1979 leh 1994 khan Egypt leh Jordan pawhin Israel hi peace accord an lo ziahpui tawh bawk.
Military parade-a ralthuam an pholan zingah hian drone leh long-range ballistic missile-te pawh a tel. Ababil, Arash leh Mohajer drone bakah, Dezful medium-range ballistic missile leh S-300 air defence missile system-te an tel bawk.
Iran air force commander, Hamid Vahedi chuan Iran hmelmate chu tihsual nei lo turin a vaukhan a, hetiang a thleng a nih chuan boruak lama bei let turin 100%-in a inpeih reng a ni, a ti.