Tlang kang avangin mi 10,000 chuang sawn chhuah ngai dawn

Indonesia hmar lam, North Sulawesi province-a Mount Ruang tlang chu Thawhlehni zing dar 10 rik hma deuh khan a kang. Nilaini khan tlang kang hi ṭum li zet a irh chhuak leh a, hei hian chhum dum nasa tak leh van lamah meivap nasa tak siamin, thuneitute chuan helai hnaia khawsa mi eng emaw zat an sawn chhuah phah a ni.

Indonesia-a volcanology agency-te chuan Mount Ruang tlang kang irh leh inṭham dinhmun hi a hlauhawm lamah level four-ah dahin, hei hi dinhmun hlauhawm ber a ni. Tlang kang lai tak aṭanga lakin a hlauhawm chin hi kilometre liah dah mah se, tunah hian kilometre rukah an zauh tawh a ni. Ruang khua aṭang hian mi 800 chu Tagulandang thliarkarah sawn chhuah an ni a, tlang kang inṭham dan enin mi eng emaw zat sawn chhuah an la ngaih tur thu leh, Manado lama sawn an tum thu an sawi a ni.

Disaster agency hotu, Adbul Muhari chuan tlang kangin a nghawng theih chhehvela cheng mi singkhat chuang chu sawn chhuah an ṭul thu a sawi a, tin, official-te chuan kum 1871-a he tlang kang avanga tuifawn thleng ang khan tuna tlang kang avanga tuifawn a thlen leh a hlauhawm thu an sawi lang bawk. Mount Ruang tlang kang avang hian Manado-a Sam Ratulangi International Airport chu khar lailawk a ni a, hei hi meivap lengin thlawhtheihna thlawk a tihbuai hlauh vang a ni.