Nagorno-Karabakh aṭangin Russia-in a sipai la let

Russia chuan Armenia leh Azerbaijan-te'n an inchuh Nagorno-Karabakh aṭangin a sipaite lak let an nih thu a puang.

Azerbaijan ram hian Armenian inlak hran duh pawl lak aṭangin Nagorno-Karabakh hmun tam zawk an lak let tawh avangin Russian peacekeeper-te hi an ram lama lak let an ni.

Azerbaijan sorkar thupuangtu chuan tunkar tir lam khan Russia sipaite an inlak chhuah ṭan thu hi an tarlang tawh a, hemi chungchang hi thu dik a nih leh nih loh Kremlin thupuangtu Dmitry Peskov chu zawh niin thu dik a nih thu ani hian a sawi a ni. Azerbaijan President advisor pakhat chuan Russia nen lungrual takin thutlukna hi an siam tih a sawi lang ve bawk. Sipai thiarchhuah hna hi kalpui ṭan tawh niin Azerbaijan defence ministry leh Russia chuan tihtur ṭul ang apiang an buaipui tih President advisor chuan a sawi bawk.

Nagorno-Karabakh hi Azerbaijan ram chinah khawvel ram dangte chuan pawm mah se, Armenian thisen kai tamna hmun a nih avangin helai hmuna chengte zingah hian Armenia rama beh duh an tam hle. Armenia lam ṭang helpawlin helai chhehvel hi kum 30 chuang zet an awp bet ṭhin bawk a, mahse, kum 2020 khan Azerbaijan sipaite chuan Nagorno-Karabakh leh a chhehvelah kar ruk chhung beihpui thlakin helai hmun tam zawk hi an thuneihna hnuaiah an dah a, nikum khan helai leh a chhehvel zawng zawng hi an thuneihna hnuaiah an dah thei tawh a ni.

Armenia leh Azerbaijan ṭhian ṭha Russia chuan remna leh muanna a awm theih nan Nagorno-Karabakh hmunah hian a sipai tir lut mah se, Armenia chuan Russia chu a lam ṭang loah puhin, ram pahnih inkar pawh a ṭhat loh phah hle.