UK PM hluiin House of Lords-ah Manipur buaina a sawi chhuak

Britain Foreign Secretary leh United Kingdom prime minister hlui David Cameron chuan House of Lords-ah Manipur tualchhung buaina thleng chungchang a sawi chhuak. Cameron hian sakhaw zalenna chungchanga Lord Bishop of Winchester zawhna a chhannaah Manipur buaina chungchang hi a sawi lang a ni.

David Cameron chuan India rama sakhaw zalenna chungchang sawiin, chi leh chi bakah hnam leh hnam inkara buaina chhuak chu tam tak awm ṭhin mah se, sakhuana chu buaina chhuah ṭhin chhan pawimawh tak a nih tel thu a sawi. Buaina tam tak chu sakhuana vang niin sakhuana leh buaina chu sawi pawlh loh harsa tak a ni, a ti. David Campanale report tihchhuah chu sawi langin Manipur buainaah Imphal phairuam leh Manipur tlang ramah Biak In tihchhiat a ni, tiin Cameron chuan a sawi.

Lord Singh of Wimbledon chuan Ayodha intualvuakna bakah Kristian leh Sikh sakhaw vuantute tihduhdahna tawrh ṭhin chungchang a sawi lang ve bawk. India ramah chuan sakhaw dang betute hnawk tihna a lian tawh hle nia a hriat thu a sawi chu Cameron chuan sawi zawmin, India ramah sakhaw zalenna a tlakhniam bakah sakhaw dang vuantute ngaihtheih lohna a zual tia sawi chu a pawmpui thu a sawi a ni. Commonwealth Charter-ah pawh sakhaw zalenna chuan hmun pawimawh tak chang se a duh tih a sawi bawk.