UN-a Palestine lak luhna tur US-in a hnawl

United Nations full member ni tura Palestine ram lak luh rawtna resolution chu Ningani khan United State chuan a veto power-in a hnawl.

UN member atana Palestine lak luh tumna hi member 193 awmna, UN General Assembly-ah pawm beiseia UN Security Council-ah hian ngaihtuah a ni a, hemi avang hian Ningani khan UN Security Council chu an ṭhu khawm a ni.

UN Security Council-ah hian member ram 15 an awm a, ram 12-in UN member-a Palestine lak luh hi an thlawp laiin US erawh chuan resolution hi a pawm lo thung a, vote laknaah hian member ram pahnih - Britain leh Switzerland an hai bawk.

Resolution ngaihtuah a nih hma hian US deputy state department thupuangtu, Vedant Patel chuan US chu a ṭanna ngaiah chiang takin a la ṭang reng a, eng anga hmalakna pawh awm se, Palestinian-te tana ram hran pek a nih phah loh tur thu a sawi. US chuan Israel leh Palestinian-te'n inbiakna nei a, inremna an siam zet loh chuan Palestinian ram hran din chu a theih loh tih a ring tlat tih a tarlang.

Tun hi Palestine tana UN member pek tuma rawtna a luh vawi hnihna a ni tawh a, UN Security Council-ah hian hnawl ni lo se, UN General Assembly-ah chuan ram 140-in Palestine ram an pawm tawh avang leh veto a awm theih tawh loh avangin awlsam taka pawm a nih beisei a ni.

UNSC-a vote lak hma hian Palestine leh Israel aiawhte chuan thu an sawi ve ve a, Palestine tana UN special representative Ziad Abu Amr chuan resolution hi thlawp vek tura ngenin, khawvel ram dangte ang bawka indepedent state nia zalen taka awm a, boruak muanawm tak hnuaia awm theih chu an châk tawh tih a sawi. Hetih lai hian Israel ambassador, Gilad Erdan chuan resolution hi pass a nih chuan October 7-a râwng taka Israel beitu, Gaza Strip-a rorel mek, Palestinian firfiak pawl Hamas-te hnena lawmman pekna a ni ang, a ti ve thung. UNSC hian resolution hi a pawm a nih chuan, Security Council ni loin, 'terror council' tia hria a ni tawh dawn a ni, a ti.