WHO-in infleunza A(H5N1) natna mihring tan a kai theih tih an tarlang

World Health Organization (WHO) chuan Ningani khan thuchhuah siamin, ar pûl hri, H5N1 chu thil nung dang zingah kai an awm tawh tih tarlangin chung zingah chuan mihring pawh an tel tih an sawi.

H5N1 hi kum 2020 khan darh ṭanin, ar tam takin an thihpui tawh a, in lama ar vulh bakah ram lama khawsa ṭhin ar pawhin he natna hi an thihpui a ni. Bawng leh kêl pawhin he natna hi an kai tih thla hmasa khan hmuhchhuah niin, heng ran pahnih hi hetiang natna kai thei lo tura ngaih an nih laia hri an kai tih hmuhchhuah a ni hian mithiamte a ṭhawng hle a ni.

WHO chief scientist Jeremy Farrar chuan,"Varak leh ar chauhin a tirah kha chuan an kai thei a, chumi hnuah mammals lam chi kai theih turin he natna hi insiamrem lehin tunah chuan he natna hi mihring pawhin an kai thei tawh a, hei vang hian ngaihtuahna hman a ngai ta hle a ni" a ti. Farrar hian influenza A(H5N1) virus chu mihringin he natna kai, ran vulh leh ramsa an khawih aṭangin an kai tih a sawi a, mahse, tun dinhmunah mihring leh mihringin an la inkaichhawng lo niin a sawi thung. Nikum April 1 aṭanga chhiarin tun thlengin ram 23 aṭangin H5N1 natna kai mi 889 an awm tih tarlangin, heng zinga mi 439 chuan an thihpui niin a tarlang.

Jeremy Farrar chuan mihring engzat chiahin nge he natna kai tih chu a hriat chian a ngaih thu a sawi a, H5N1 do nan hian vaccine siam mek a nih thu a tarlang tel bawk. Hemi bakah hian a natna kaite enkawl dan ṭha ber pawh mithiamte'n an duang mek tih Farrar chuan sawiin, khawvel ram zawng zawngte chu he natna kaite hmuchhuak thei turin a chah bawk a, chu chu mihring leh mihring inkaichhawn theih tura he natna a insiam danglam a nih chuan a ṭangkai tur thu a sawi.