Ukraine PM Zelenskyy thah tum nia hriat Poland-ah man

Ukraine prime minister Volodymyr Zelenskyy thah a nih theih nana Russia sipaite pui tura inpe nia hriat, Pawel K. chu Poland-ah man a ni.

Pawel K. hi Poland mi a ni a, man a nih hnu hian Poland National Prosecutor office chuan thuchhuah siamin, Pawel hian Russia sipaite hnenah thu pawimawh tak tak a thlen ṭhin thu leh, an hriat duhte a hrilh ṭhin thu an tarlang. Polish prosecutor-te chuan Pawel hian Russian Federation intelligence service aiawha chet chhuah a inhuam thu a sawi nia tarlangin, Russia khua leh tui, Ukraine nena indonaa tel mek te nen an inbepawp bawk niin an sawi.

Pawel hian Ukraine leh Poland inrina bul, Poland chhim chhak lama Ukraine tana chhawmdawlna thawn luhna leh khawvel ram dang sipaite Ukraine-a an luhna kawng ber; Rzeszow-Jasionka airport dinhmun kimchang chu Russia sipaite lo luh theih nan pek a tum niin an sawi a, he airport hi US sipaite'n an enkawl mek a ni. He airport-ah hian Prime Minister Zelenskyy hi a zin chhuah dawn apiangin a kal ṭhin a, hei vang hian Zelenskyy thah tumna a awm nia hriat a ni bawk a ni.

Polish prosecutor-te chuan Pawel an man theih chhanah hian Ukraine prosecutor te leh venhimna hna thawktute nena an thawh dunna ṭhat vang niin an sawi a, thu chiang zawk hre tura hnu chhui mek a nih thu sawiin, Pawel chu Russia tana enthlatu a nih ngei chuan kum riat tal lung ina dah theih a ni dawn niin an sawi.

Poland hi Ukraine khawthlang lama awm niin, nikum April thla khan Zelenskyy hian a lo tlawh tawh a, an ram mipuite leh president Andrzej Duda pawhin an lo lawm hle. Russia-in Ukraine a run hnuah, Ukraine aṭang hian mi tam tak chu Poland-ah hian an tlanchhia a ni.