US-in Ukraine leh Israel ṭanpuina pek tur a pawm

US House of Representative chuan Ukraine, Israel leh an ram ṭhian ṭha dangte ṭanpuina turin USD tld. 95 a pawm ta. He thutlukna hi US-a party lian pahnih Democrats leh Republicans chuan an thlawp ve ve a ni.

Inrinni liam ta khan Ukraine ṭanpui nan hian USD tld. 61 pawm niin, Russia nena indo mek Ukraine a thlawp zia lantirna pakhat a ni bawk. Israel bakah US ṭhian ṭha ram dang ṭanpuina tur sum pawh pawm chhunzawm ve nghal niin hemi rual hian US-a TikTok tihtawpna tur pawh pawm a ni bawk. Heng bill-te hi Senate-ah ngaihtuah leh a ni dawn a, Senate hian naktuk ral hmain thutlukna an siam hman a rinawm.

US president Joe Biden chuan House of Representative speaker Mike Johnson, Democrats leader Hakeem Jeffries leh party dangte hnenah US dah hmasaa Bill pawimawh tak an pawm avangin lawmthu a sawi. President chuan Senate lam pawh rang taka pawmpui turin a ngen a, a dawhkan a thlen hun a nghahhlelh thu leh rang taka amah ngei pawhin a hming ziah hnan a tum thu a sawi.

Ukraine president Volodymyr Zelenskyy chuan X lamah lawmthu sawina tarlangin, House chhunga party pahnihte leh Speaker Johnson hnenah lawmthu a sawi ve bawk.

US House pahnihah hian tun hnaiah ṭanpuina pek tur sum chungchang sawiho ṭhin ni mah se, member ngah zawk,Republican party chuan an dodal ṭhin avangin US House of Representative hian a pawmpui thei ṭhin lo a ni. Tunah chuan Democrats mai bakah Republicans lam pawhin ṭanpuina sum pek tur chungchangah inthurualin thu an titlu thei ta a ni.