US-in IDF unit hrek a tum nia sawi Israel-in chhang let

American media-te chuan US State Department in Israel Defence Force (IDF)-a Netzah Yehuda battalion hrek a tum niin an report a, hei hi Israel prime minister Benjamin Netanyahu leh cabinet minister-te chuan an chhang let nghal.

Prime Minister Netanyahu leh a cabinet minister-te hian X-ah report chungchang hi na takin an chhang let a, US-in IDF unit hi a hrek a nih chuan thil awm lo tak a nih tur thu an sawi. Netanyahu chuan US sorkara senior official-te pawh a biak tawh thu sawiin, Israel mi leh sa chunga hrekna siam hi an dodal tlat tih a hrilh thu a tarlang. 'Kan sipaite'n firfiakte doa theihtawp an chhuah laia, IDF unit hrek tumna thawm a awm hi thil awm lo leh atthlak tak a ni," tiin, he thil hi a taka kalpui a nih lohna turin a kaihhruai sorkar chuan a theih dan zawng zawngin hma a la dawn tih a sawi bawk.

Israel national security minister, ultra-orthodox right-wing politician, Ben Gvir pawhin X-ah hemi chungchang hi sawiin, he thil hi an ti tak tak a nih chuan an huang chin pelah ngaiin, an ngaizam mai dawn lo tih a sawi. Gvir chuan Israel defence minister Yoav Gallant hnenah Netzah Yehuda battallion chu theihtawpa thlawp turin a ngen bawk.

Finance minister Bezalel Smotrich pawh a ṭawng na hle. Israel sipai unit hrek tumna awm ringawt pawh hi Israel ram chu Palestinian ram dinna tur pawm tur leh, Israel himna ngai pawimawh lo tura nawrna a ni, a ti hial.

American media-te chuan Netzah Yehuda battallion hian West Bank-ah mihring dikna chanvo an palzut nia puh an nih avangin hrek an ni dawn niin an tarlang a, hetih lai hian US sorkar lam aṭang erawhin hemi chungchangah hian official-a thuchhuah engmah a la awm lo thung.