2024 World Press Photo of the Year dawngtu Mohammed Salem

Reuters tana thla latu, Mohammed Salem chuan October 17, 2023-a Gaza chhim lam, Khan Younis-a Nasser hospital-a Israel-in bomb a thlak avanga nu pakhatin a vahnu thi ta a sun lai thla a lak hmangin 2024 World Press Photo of the Year lawmman a dawng.

Mohammed Salem-a thlalaka lang nu hi Inas Abu Maamar niin, kum 36 mi a ni a, Nasser hospital mitthi ruang dahnaa a vahnu, Saly ruang pawm chunga a ṭap lai thla hi Salem hian a lo la ni. 2024 World Press Photo of the Year lawmman a dawn chungchangah hian Salem chuan a thlalak chu lawmna tur lam a nih loh thu leh, hmun zau zawk thlenga mi ngaihven a hlawh avang erawh chuan lawmawm a tih thu a sawi. "He thlalak avang hian khawvel hian indona avanga mihringin kan tawrhna, a bik takin naupangin an tawrhna hi phochhuah ni se, harh chhuah phah ila ka duh," tiin a sawi. Salem hi Palestine mi a ni a, kum 2003 aṭang khan Reuters tan hian thawk tawhin, 2010 khan world press photo competition-ah lawmman a lo dawng tawh bawk a ni.

Award buatsaihtu, Amsterdam-a World Press Photo Foundation erawh chuan hmun ralṭia journalist-te dinhmun hlauhawmzia hian hriat hlawh leh zual se an duh thu an sawi a, Israel leh Hamas indonaah ringawt pawh journalist leh media mi 99-in nunna an chan tawh niin an tarlang. World Press Photo Foundation hian ram 130 aṭanga thlalatu 3,851-in an thlalak an theh luh, 61,062 aṭangin 2024 World Press Photo of the Year lawmman dawng tur hi an thlang a ni.