2023-ah ralthuam atana sum hman 7%-in a pung : SIPRI

Stockholm International Peace Research Institute (SIPRI) chuan nikum chhung khan khawvel pumah ralthuam atana sum hman chu 7%-in a pung a, hei hi USD 2.43 trillion hu zet a ni tih a tarlang. SIPRI chuan ralthuam atana sum hman punna hi kum 2009 hnu lama a san ber ṭum a ni tih an tarlang tel bawk.

SIPRI chuan United States, China leh Russia chu sum hmang hnem berte an nih thu tarlangin senior researcher, Nan Tian chuan khawvela ram hrang hrangte'n an ram venhim nan ralthuam neih ṭhat chu ngai pawimawh mah se, ralthuam ṭha chu khawvela buaina tamzia tilangtu leh, ralmuan lohna thlentu kawng khat a ni ve tho tiin ralthuam neih ṭhat chuan nghawng ṭha lo a nei tel niin a sawi.

Nikum chhunga ralthuam atana Russia sum hman chu 24%-in a pung tih SIPRI chuan tarlangin, hei hi USD tld. 109 hu a nih tih an sawi. Russia nena indo mek Ukraine sum hman pawh 51% laiin a pung a hei hi USD tld. 65 hu a ni. Hemi bakah hian ram hrang hrang aṭangin USD tld. 35 chuang zet puihna an dawng bawk nia tarlan a ni. NATO hnuaia ram hrang hrangte sum hman chu khawvel ram zawng zawng sum hman aṭanga chawhrualin 55% a tling phak nia tarlan a ni bawk.

SIPRI researcher Lorenzo Scarazzato chuan Europe-a NATO member-te'n an ram himna chungchanga an thil thlir dan chu Ukriane-a kum hnih chhung indona chuan a sawi danglam nasa hle niin a sawi a, heng avang hian NATO member-te'n ralthuam atana an sum hman hi a pun phah niin a sawi.