US university ṭhenkhatah Gaza war duh lohna lantir

US-a university ṭhenkhat zirlaite'n Gaza Strip-a indona thleng mek duh lohna leh dodalna an lantir a, zirlai ṭhenkhat manin, class cancel a ni bawk.

October 7, 2023-a Palestinian pawl, Hamas-te'n Israel an beih leh, hemi hnua Israel-in Gaza Strip-a Hamas laka beihpui a thlak chhoh chungchangah US campus hrang hrangah inhnialna leh, lungawi lohna lantirna a thleng zui reng a ni. Zirlaite hian Israel-Gaza indona a thlen hnu hian Juda leh Islam huatna lantirna lam kaihhnawih thil a thleng fo niin an sawi.

Thawhṭanni zan khan New York University-ah Gaza Strip-a indona thleng mek duh lohna lantirin nawrh huaihawt a ni a, police-te chuan nawrh huaihawtte hi hnawt kiangin, an zinga eng emaw zat an man. Hemi ni vek hian Yale-ah nawrh huaihawt zirlai ṭhenkhat man an ni bawk a, Columbia University chuan physical class an cancel a, virtual hmanga neih a nih rih dawn tih an sawi. Heng bakah Berkeley, MIT-ah pawh lungawi lohna lantir a ni bawk.

Columbia University-ah hian ni nga chhung Gaza war duh lohna lantir a ni tawh a, White House deputy secretary, Andrew Bates chuan zirlaite hian boruak ṭha tak hnuaia nawrh huaiawt tura dikna an neih rualin, Juda mite huatna lantir leh bitum zawng te, tharum thawhna thleng zawnga an chetna chu an dem thu a sawi. President Joe Biden chuan college campus-a nawrh huaihawtnaa Juda hnam huatna lam kaihhnawih thleng chu a dem tak zet tih a sawi a, mahse, university hming sawi rik erawh a nei lo. " Tun hnaiah Juda mite laka tharum thawhna leh tihnawmnahna lam hawi thil kan hmu fo a, hei hi thil pawm theih loh leh hlauhawm tak a ni a, hetiang inhuatna lam thil hian college campus chauh ni lo, kan ram pumah hmun an nei lo," tiin a sawi.