UK-in an rama sahimna zawnga lutte dahna turah dan siam

United Kingdom sorkar chuan an rama sahimna zawnga tlanchhiate chu Rwanda-ah dah an nih theihna turin dan an siam. UK parliament upper house chuan an rama sahimna zawnga tlanchhiate Rwanda-a dahna tur hi inhnialna nasa tak karah an pass a ni.

He dan siamna tur hian UK Parliament-a house of lords an tih, upper house-ah hian hun eng emaw chen inhnialna awmin, bill hi pass a nih hmaa siam ṭhat ngai a awm thu te an sawi a, hei vang hian pass a ni lawk lo a ni. Hetih lai hian UK prime minister Rishi Sunak chuan bill chu pass a nih theih nan a ṭul chen chen house chu an ṭhut khawm tur thu a sawi thung. Rishi Sunak hian an rama sahimna zawnga tlanchhiate chu Rwanda, Kigali pana thlawhtheihna hmasa berah thawn an nih nghal tur thu a sawi bawk.

Mithiam ṭhenkhat leh United Nations human rights expert-te chuan UK-in Rwanda scheme a pass tak hi sawiselin, dan siam duhte lam erawh chuan dan siam chu English channel kaltlanga lawng tê hmanga UK-a lo tlanchhe ṭhinte pung nasa lutuk tur thunun nan a ṭul thu an sawi ve thung a ni. He bill hian kar tawp lamah King Charles-a pawmpuina a hmuh beisei a ni a, lal hian a pawmpui a nih chuan dan a ni nghal dawn a ni.