UK dan thar siam ngaihtuah ṭha turin UN-in a ngen

United Nations High Commissioner for refugees, Filippo Grandi leh United Nations High Commissioner for human rights, Volker Turk-te chuan United Kingdom-in an rama sahimna zawnga tlanchhiate Rwanda-a dah tura dan a siam chu ngaihtuah ṭha turin an ngen.

United Nations official-te hian UK sorkar chu an rama sahimna zawnga tlanchhiate Rwanda-a an dah chuan mihringin dikna chanvo a neih leh raltlante venhimna tur a nghawng dawn niin an sawi. UK chuan an rama raltlan leh sahimna zawnga lut tam lutuk ven leh thunun nana dan siam lo a, awmze nei zawka hma la tura an duh thu an sawi bawk.

English channel-a lawng chesualah mi panga an thi

UK sorkarin an rama sahimna zawnga lut leh raltlante Rwanda-a thawn tura dan a siam hnu lawkah, Thawhlehni khan Wimereux, France aṭanga United Kingdom (UK) pan, raltlante chuanna lawng ni ngeia hriat chu English channel tuipuiah chesualin mi pangain nunna an chân. Chetsualnaa nunna chân zingah hian patling pathum leh hmeichhe pakhat bakah naupang pakhat a tel a ni.

Raltlante hi sahimna zawnga UK pan an ni a, lawng chetsual hnu hian chhanchhuah hna thawktu, French coastguard-te chuan mi 49 an chhanchhuak a, mi pali chu damdawi-inah kalpui niin, midang erawh chuan lawng hmang hian Britain an pan chhunzawm thung niin an sawi. Coastguard-te sawi danin raltlante chuanna lawng hi tuipui kam aṭanga hla vak loah a ding a, hemi hnu hian mi eng emaw zat tuiah an tla a ni, an ti.

UK sorkar hian Thawhlehni khan an rama sahimna zawnga lut leh raltlante enkawl dan tur chungchangah dan thar siamin, Rwanda-ah thawn an nih tawh tur thu an puang a ni. He dan pass a nih hnu lawk hian UK prime minister Rishi Sunak chuan kar 10 chhungin raltlante hi Rwanda-a thawn vek hman an tum thu a sawi zui bawk. Kuminah ringawt hian lawng tê, a phur theih chin aia tam chuanga raltlan phur ṭhin eng emaw zat hmangin raltlan 6,000 chuangin Britian hi an lut tawh a ni.