US Senate-in Ukraine leh Israel ṭanpuina tur pawm ve leh

US House of Representative-a Ukraine leh Israel ṭanpuina tur bill pawm a nih hnuah US House sang zawk, Senate-ah ngaihtuah ve leh niin, a duh lamah vote 79 tlain a duh lo lamah vote 18 chauh a tlak avangin pawm a ni ve leh ta a ni.

Ukraine leh Israel bakah hian Taiwan pawh telin ram pathum ṭanpui nan hian USD tld 95 theh chhuah a ni ang. Thawhlehnia pawm tak, ṭanpuina sum US-in a pek tur hmang hian Ukraine-ah indo nan ralthuam tam zawk thawn luh tum a nih bakah, USD tld. 26 chu Israel leh Gaza mipui, indona avanga tuarte ṭanpui nan ruahman a ni bawk. Hemi baka la bang USD tld. 8 chu Taiwan tana ruahman niin China lian zel tur ven nan leh, Pacific tuipuia US tana hnawksak zawnga khawsate beih let nana ruahman a ni thung.

Senate-a majority leader, Chuck Schumer chuan US Congress-in ṭanpuina sum hi a pawm lo a nih chuan America chuan a nghawng ṭha lo tak an tuar thei niin a sawi a, tuna an thutlukna siam chu nakin hun thlenga la pawimawh tur a nih thu a sawi bawk. Schumer bakah Senate-a Republican hotupa Mitch McConnell chuan Putin-a beihna lak ata Ukraine an puih loh chuan US leh an ṭhian ṭha ram dang chuan nakin lawkah an tuar thei niin a sawi ve bawk.

US Congress-in ṭanpuina sum a pawm tak avang hian president Joe Biden remtihpuina la turin, President office lamah thawn leh a ni ang. Biden hian US House of Representative-in Ukraine leh Israel ṭanpuina tur a pawmpui hnuah a lawmzia a lo sawi tawh a, Senate pawhin a pawm ve leh ngei a beisei thu sawiin a dawhkân a thlen hlan a nghahhlelh thu a lo sawi tawh a ni. Hemi a nih avang hian President pawmpuina hmu tur hian hun a duh rei a rinawm lo hle.