Netanyahu-a'n US campus-a nawrh huaihawt a dem

Israel prime minister Benjamin Netanyahu chuan US-a college campus eng emaw zata Palestinian thlawptu zirlaite'n nawrh an huaihawt chu a dem thu a sawi.

US-a college campus ṭhenkhatah zirlaite chuan Gaza Strip-a indona thleng duh lohna lantirin nawrh an huaihawt a, New York-a Columbia University aṭanga inṭanin, nawrh huaihawtna hi a pun belh zel a ni. Heng zingah hian US-a college leh university langsar tak takte pawh an tel. Hetih lai hian Juda zirlaite chuan he nawrh huaihawt hi Juda-te huatna leh enhranna lantirna niin an puh thung.

Campus-a nawrh huaihawt zirlaite hian Gaza Strip-a inkahhai puan an phût bakah, US sorkar chu Israel sipaite ṭanpuina a pek ṭhin titawp tur te, ralthuam supply-tu company-te hnenah university investment siam ṭhin tihtawpte an phût a ni. Nawrh huaihawt zinga zirlai eng emaw zat chu man an ni tawh.

Juda zirlaite chuan campus hrang hranga nawrh huaihawt chu Juda huatna lantirna a ni tiin, Israel leh Juda mi hrim hrim dodalna niin an ngai. Mahse Palestinian thlawptu zirlai nuar mekte hian Israel laka lungawi lohna lantir chu Juda huatna a ni lo tiin an ṭang ve thung.

Israel prime minister Netanyahu chuan US-a zirna hmun pawimawha nawrh huaihawt mek chu thil rapthlak tak a ni tiin, US-a university langsar tak takte chu Juda hawtute chuan an thunun a ni, a ti. "Israel nuai bo an duh thu an aupui a, Juda zirlaite beiin, Juda zirtirtu thlengin an bitum tel a ni," tiin a sawi. Video message a tihchhuahah he thu hi sawiin, United State campus-a Juda huatna lantirna thleng mek chuan kum 1930 chhoa German university-a Nazi-hoin Juda mite an beihna thleng a hriat chhuahtir thu sawiin, khawvel chuan ngawi rengin a en liam mai tur a ni lo, a ti.