Vansanga ralthuam dah duh lohna resolution Russia-in a veto

Russia chuan United Nations Security Council (UNSC) meeting neih meka US leh Japan-in draft resolution an put luh, ram hrang hrangin vansanga ralthuam dah lo tura intiamkamna tur chu a veto power-in a hnawl.

US chuan Russia hian vansanga awm thei, satellite bei thei tura duan nulcear ralthuam a buaipui mek niin a sawi a, hei vang hian 1967-a ram hrang hrangin an lo ziah tawh, Outer Space Treaty chu vawn nun a nih theih nan UNSC-ah hian resolution hi a pu lut a ni. Russia erawh chuan US puhna hi phain, 1967-a treaty ziah saah chuan an din ngheh thu an sawi ve thung. Outer Space Treaty-ah hian ram eng emaw zat chuan khawvel hel thei zawnga ralthuam siam leh ralthuam keng thei khawvel hel tur ang chi reng reng siam lo turin an intiam a ni.

UNSC-ah hian member 15 an awm a, member 13 chuan US resolution put luh hi thlawpin China chuan vote a thlak lo a, Russia hian resolution hi a veto ta a ni. US ambassador, Linda Thomas-Greenfield chuan Russia chet dan chu thil tih awm lo tak a nih thu leh, resolution lang tlang tak, hmana an lo intiam tawhna intiam nawnna mai ni si a veto ta mai chu hriatthiam har a tih thu a sawi.