UN Report : Kum 2023-ah mi mtd 282 ei tur khawpkham lo an awm

United Nations agency chuan report tichhuakin, kum 2023 khan khawvelah ei tur tlachham an tam hle a, mi maktaduai 282 zet ei tur kham khawp hmu lo an awm tih a tarlang. Sudan leh Gaza-ah buaina thleng avangin ei tur nei lo an tam hle a ni.

Ei tur khawpkham lo hi kum 2022 ai khan mtd 24-in an pun belh tih Food Security Information Network (FSIN) report chuan a tarlang. Eitur tlachham hi tunhnai kum nga chhung chu kum tin an pung chho a, ram chhung sum dinhmun tlachhia leh sik leh sa danglam nasa lutuk chu a chhan langsar tak zinga mi a ni.

Kum 2023-a ei tur tlachham an pun chhan hi ram hrang hrang 12 dinhmun a tlakhniam vang leh, kum 2022 a zir chianna an kalpui lohna hmunah tih thar a nih vang a ni tel bawk. UN Food and Agricultural Organization (FAO) deputy director, Fleur Wouterse chuan hmun ṭhenkhatah ei tur khawpkham loh chu thil thar ni mah se, Sudan leh Gaza Strip-ahte chuan thil thleng thar ni loin a hma aiin a nasa zawk thung tih a sawi.

Khawvel ram zingah tualchhung emaw ram dang emaw nena buaina neih avanga ei tur khawpkham lo an tamna chu Afghanistan, Democratic Republic of Congo, Ethiopia, Nigeria, Syria leh Yemen-te niin, naupangte chu a tuartu zinga mite an ni. Eitur tlakchhamna hian ziaawm lam a pan theih nan ram hrang hranga buaina awmte chu tihreh a ngai niin Wouterse chuan a sawi. Buaina bakah hian sik leh sa inthlak danglamin a thlen, khawkheng leh tuilian avanga ei tur tlachham tam tak an awm tih tarlan a ni bawk.