US-in a rukin Ukraine hnenah long-range missile a pe

United States (US) chuan Russia nena indo mek, Ukraine ram tan a rukin long-range ballistic missile a pe a, he ralthuam hi Ukraine pawhin a hmang ṭan tawh niin American official-te chuan an sawi.

He ralthuam an pek hi US president Joe Biden-a'n March thlaa Ukraine ṭanpuina tura USD mtd 300 hu pekna tur a lo pawm tawha mi kha niin, tun thla tir lam khan Ukraine hi a thleng a ni. US media chuan he long-range ballistic missile hi Ukraine chuan Crimea-a Russia beihna atan a hmang tawh niin an tarlang.

US hian a hmain Ukraine tan hian Army Tactical Missile Systems (ATACMS) mid-range version a lo pe tawh bawk a, mahse, hei aia ralthuam chak leh hlauhawm chu a pe chhunzawm tawh lo. Mahse tun hnaiah President Biden remtihnain km 300 thleng kap pha tur missile hi a rukin a pe leh ta a ni.

State department thupuangtu, Vedant Patel chuan, "President thupek angin US hian Ukraine hnenah hian long-range ATACM hi a pe ngei a ni," tiin , hemi chungchang hi Ukraine ngenna avanga puangzar lo a nih thu pawh a sawi bawk. US hian ralthuam eng zat chiah nge a thawn tawh tih a sawi chiang lo a, mahse, US National Security advisor Jake Sullivan chuan a dang pawh thawn belh zel an la tum niin a sawi.