UAE-in ruah surin a tihchhiatte siam ṭhat nan USD mtd 544 ruahman

United Arab Emirates (UAE) chuan kar liam taa ruah sur nasa takin an rama in leh thil dang tam tak a tihchhiate siam ṭhatna atan USD mtd 544 ruahman a nih thu a puang.

Prime minister Sheikh Mohammed bin Rashid al-Maktoum chuan cabinet meeting-ah minister-te chuan ruah surin in a tihchhiatsakte puihna atan dirham tld 2 an pawm tih a sawi a, 'Ruah sur nasa tak mai kan tawrh aṭang khan zirlai pawimawh tak kan zir chhuak nghal a ni," a ti.

Ruah surin in a tihchhiatte puihna tur hmalakna en zui tur hian ministerial committee ruat nghal an ni a, tualchhung thuneitute nen harsatna tawkte hnenah zángnadawmna sem chhuah kawngah pawh an thawkho zel dawn a ni, a ti.

Kar liam taa UAE-a ruah sur kha kum 75 chhunga a sur nasat ber ṭum niin, chhiatna thlengah mi pali an thi a ni. Ruah surin thil a tihchhiat zat hi official chuan puan a ni lo. Mahse infrastructure chhia leh siam ṭhat a nih theih dante en a, ngaihtuah zui turin cabinet minister-te chuan committee an din belh a ni.

Ruah sur hian Dubai International (DXB) airport-in kum 63 chhunga harsatna a tawh lian ber a thlen bawk a, flight 2,155 vel cancel niin, flight cancel la tam ber ṭum a ni. Dubai Airports CEO, Paul Griffiths chuan,"Khawvela international airport lun ber niin, ni tin khawvel ram hrang hranga hmun 250-a kal tur, khualzin nuai 2 chuang kan buaipui a, flight hi 1,100 chuang a awm ṭhin. A hmain harsatnate pawh lo tawk ve ṭhin mah ila, tun ṭuma buaina leh harsatna lian hi kan la tawk ngai lo," a ti.