Bangladesh-a Myanmar sipai tlanchhiate thawn lêt

Bangladesh chuan an rama tlanchhia, Myanmar sipai leh civil mi 300 vel chu Myanmar-ah an thawn lêt. Bangladesh-a raltlan sipaite hi an outpost beih a nih hnua an sahimna zawnga tlanchhiate an ni.

Kum 2021 aṭanga sipai sorkar hnuaia Myanmar a awm hnuah sipaite leh sipai sorkar dodaltu helpawlte hi an la inbei reng a, Myanmar-Bangladesh nena an inrina bulah Arakan Army nen an inbeih ṭhin avangin nikum kum tawp lam aṭang khan mi tam tak chu Bangladesh panin an tlanchhia a ni. Bangladesh sorkar thuneitu pakhat chuan Naniarchar lawng chawlh hmun aṭangin Ningani zing dar 6 khan Myanmar sipai, police leh civil mite hi thawn lêt an nih thu a sawi. Thawn let zinga a tam zawk chu Myanmar Border Guard Police an nih thu leh, an zingah hian Myanmar sipai leh immigration thuneitu lam pawh an tel tih tarlan a ni.

Myanmar ram a buai avang hian Bangladesh chuan ramriah venhimna khauh lehzualin an kalpui a, hei hi a chhan bulpui ber chu Rohingya raltlan tam zawk an rama an luh a hlauh vang a ni. Kum 2017 hnu lamah, tihduhdah an tawh vangin Myanmar aṭang hian Rohingya maktaduai khat chuang Bangladesh-ah hian an tlanchhe tawh a ni.