Eiruk thubuai kaihhnawihah Malaysia PM hlui Mahathir chhui mek

Malaysia Anti-Corruption Commission (MACC) chuan an ram prime minister hlui, Mahathir Mohammad chu a fapte eirua puhna thubuai kaihhnawihah chhui tel a nih thu a sawi.

MACC chief commissioner, Azam Baki chuan Mahathir chhui tel a nih thu hi sawiin, investigation zawh fel a nih hma chuan engmah sawi theih an nei rih lo tih a sawi nghal bawk. Mahathir-a thupuangtu pawhin hemi chungchang hi engmah a sawi chiang duh lo.

Mahathir Mohammad hi kum 1981-2003 leh 2018 -2020 khan Malaysia prime minister a ni. A deputy ṭhin, Anwar Ibrahim chu kum 2022 khan prime minister atan thlan tlin a ni a, Anwar hian an rama eirukna nuaibo tuma hma a lak tur thu leh, dinhmun sang zawkte aṭanga bul ṭan a tum thute a lo sawi tawh a ni. Mahathir-a fapa pahnihna, Mirzan Mahathir leh Mokhzani Mahathir-te chu Pandora leh Panama Paper leak-ah an hming a lan avangin MACC hian chhuiin, an thil neih zat puang turin a lo hriattir tawh a ni. Anni pahnih bakah, Mahathir-a thawhpui hnai tak, finance minister hlui Daim Zainnuddin leh a nupui pawh thubuai siamsak an ni bawk.