France biak-ina awmte chem nen bei Hmeichhe pakhat lu tansak

France chhim lam, Nice khuaah Ningani khan mi  pakhatin Notre-Dame biak-ina awm mi pahnih leh a bul cafe-a awm mi pakhat a that a, a mi thah zinga hmeichhe pakhat chu a lu a tansak. 

Pawikhawihtu hi Brahhmin Aooussaoui, kum 21, Tunisia ram mi, October thla tir lama Italy aṭanga France rama lut nia sawi a ni. Pawikhawihna a thlen lai hian chem kengin, 'Allahu Akbar' (Pathian a ropui ber) tiin a au a ni. 

Nice khuaa pawikhawihna a thlen hnu lawk hian France chhim lam, Avignon khuaah mi pakhatin silai nen kawng kalte a vau bawk a, ani pawh hi 'Allahu Akbar' tiin a au bawk . Police-te chuan bei letin an kap hlum a ni. 

France president Emmanuel Macron chuan an rama sakhaw hmun pawimawh leh school-ahte venhim hna thawk turin sipai tam zawk dah a nih tur thu a puang nghal.

Chief anti-terrorist prosecutor Jean-Francois Ricard chuan Nice biakina awmte beitu hi Ningani khan rel hmangin Nice khuaah hian a lut a, biak-in hi pan nghalin mi pakhat vithlumin hmeichhe pakhat lu a tansak a, biak-in bula cafe-a awm hmeichhe pakhat chu a vit hlum bawk tih a sawi. Pawikhawihna thlenna hmunah hian police-te kal nghalin an kap hliam a, damdawi-in lamah dah a nih thu leh, a dinhmun pawh a ṭha vak lo niin a sawi. 

Ricard chuan pawikhawihtu kut aṭang hian Koran bu leh telephone pahnih, bakah mi thatna atana a chem hman chu hmuh a nih thu a sawi. Bag dang pakhat, chemte pahnih awmna pawh hmuh tel a ni bawk. France thuneitute chuan pawikhawihna thleng hi firfiakte nena inzawmna an neih an ring. 

Ram hrang hrang hruaitute chuan France rama pawikhawihna thleng hi an dem thu an sawi a, US president Donald Trump chuan Islam firfiakte pawikhawihna thlen ṭhin chu tihtawp a ni tawh tur a ni, a ti. 

Europe ram zingah Muslim tamna ber ram, France-ah hian Islam firfiakte pawikhawihna a thleng fo. Kum 2015 khan Paris-a firfiakte pawikhawihna thlen avangin mi 130 an thi a, kum 2016 khan Nice-ah firfiak pakhat chuan Bastille Day hmanga pungkhawmte truck-in a pawng chil a, mi 86 an thi bawk a ni. 

Tun hnai maiah pawh Paris khawpui daiah school zirtirtu, Samuel Paty chu a naupangte a zirtirnaah zawlnei Muhammed-a lem entir avangin a lu tansak a lo ni tawh bawk. Paty hi a thih hnuah France chawimawina sang, Legion d'Honneur hlan a ni.