Russia-in Covid-19 vaccine enchhinna titawp lailawk

Russia chuan Covid-19 vaccine phase III trial a neih mek chu vaccine indaih tawk lohna awm avangin a titawp lailawk nia sawi a ni. 

Russia health ministry nena Moscow-a vaccine enchhinna nei mek, research organisation Crocus Medical aiawh chuan tihtawp lailawk a nih chhan chu enchhinna neihna tur atan vaccine hi a tam tawk loh vang niin a sawi. November 10-ah trial hi chhunzawm leh nghal tum a ni tih a sawi. Vaccine hi enchhinna neih tawh chinah sawiselna a awm lo niin medical journal The Lancet chuan a tarlang.