ICC-in Israel PM manna thupek a tichhuak maithei niin sawi; US-in ICC a vau nghal

Israel official-te chuan Gaza Strip-a Israel-Hamas indona thleng mek chungchangah, International Criminal Court (ICC) chu Israel laka action la tura nawrna a nasa zel a, hei vang hian Israel prime minister Benjamin Netanyahu bakah, Israel ram hruaitu dang manna thupek, arrest warrant a tichhuak mai thei niin an sawi. Hetih lai hian court lam aṭang chuan sawi engmah a la awm lo thung.

Israel foreign ministry chuan, Israel political leh military official-te lakah ICC hian arrest warrant a tichhuak mai thei nia thuthang a awm thu sawiin, court chuan he thil hi a tih loh a beisei thu foreign minister Israel Katz chuan a sawi. Israel official-te laka arrest warrant tihchhuah a nih chuan, Hamas leh firfiak pawl dangte tha tihchakna mai tur a ni, a ti.

Gaza Strip-a indona a chhuah hnuah, ICC hian tun ṭuma indona chauh ni loin, 2014-a Israel-Hamas war aṭangin a chhui a, Israel leh Hamas lamin pawikhawihna an thlen dante a chhui bakah, Israel-in Palestinian ram a luaha Juda-te chenna tur in a sak chungchangte pawh a chhui tel bawk. ICC prosecutor Karim Khan chuan nikum December thla khan Gaza Strip pawh hi a lo tlawh tawh a ni.

Hetih lai hian Israel PM Netanyahu chuan Israel-in a ram venhimna tura a dikna neihte a lekkawh chungchang ICC-in ṭhiahsak a tumna chu eng kawng mahin an pawm dawn lo tih a lo sawi lawk tawh a ni. 'Middle East-a democracy ram awm chhun, khawvela Juda ram neih chhun sipai leh official-te vau daih tumna hi a thinurthlak hle. He thil lakah hian kan tlawm dawn lo," tiin a sawi.

US-in ICC a vaukhan

ICC-in Israel Prime Minister leh official dangte manna tur thupek a tichhuak maithei nia thuthang awm chu US leh a thawhpui ram dangte'n an ngaimawh nghal hle.

US chuan Gaza Strip-a indona thleng mekah, inkahhai puan a nih theihna tura hma lak mek chu ICC-in arrest warrant a tihchhuah chuan a tichhe vek thei dawn niin a sawi. ICC hian warrant hi a tichhuak a nih chuan, inremna siam tumna aṭangin Israel hi a inhnukdawk duh ngei dawn a, hei hian remna siamna kawng a tiping dawn a ni, a ti. US leh European Union chuan Hamas hi firfiak pawlah an lo puang tawh a ni.

White House thupuangtu, Karin Jean-Pierre chuan ICC thil chhui chungchang hi kan thlawp lo tih pawh chiang takin kan lo sawi tawh a ni, hetiang ti tur niin kan hre lo, tiin a sawi. US secretary of state Antony Blinken pawhin Hamas pawl hruaitute chu Israel-in inkahhai lailawk puanna tura rawtna a siam chungchangah thutlukna siam vat turin Thawhṭanni khan a lo nawr tawh bawk. Israel hian Hamas mi hren mekte chhuah an nih theihna turin, inkahhai puanna tur rawtna a siamah pawh a inhawng zau hle a ni, a ti.