Covishield vaccine-in side effect a thlen theih thu sawi

AstraZeneca chuan court document-ah Covid-19 vaccine a siam, Covishield leh Vazevria brand hminga khawvel huapa hralh chhuah chuan side effect a thlen theih thu a sawi rualin, a thlen erawh a khat hle niin a tarlang.

He vaccine hi AstraZeneca leh Oxford University-in duangin, Serum Institute of India-in a siam chhuak a, India bakah middle-income ram hrang hrangah thawn chhuah a ni. Hetih lai hian UK-ah chuan an vaccine hian thihna bakah thluak natna a thlen thei nia sawiin AstraZeneca hi an khing. UK High Court-ah thubuai 51 zet theh luh a ni.

AstraZeneca chuan an puhna hi a pha a, hemi rual hian vaccine hian side effect, Thrombosis with Thrombocytopenia Syndrome (TTS) a thlen thei a, mahse, hei pawh hi a vang hle niin a tarlang.

World Health Organisation (WHO) chuan he vaccine hi kum 18 chung lam tan a himin a thawk ṭha tawk niin a sawi a, side-effect a thlen nia sawi chu a tlem hle ang tiin a sawi.