Ukraine beihna atan North Korea missile hman a ni : UN expert
United Nations (UN) sanction monitor-te chuan kumin January 2-a Ukraine-a Kharkiv khawpui beihna atana missile hman chu North Korean Hwasong-11 series ballistic missile a ni tih UN Security Council (UNSC) a hrilh.
UNSC-a phek 32-a chhah report an theh luhah, UN sanction monitor-te chuan Kharkiv khawpui kahna atana hman, missile hman themte chu enfiah niin, DPRK Hwasong-11 series missile them ngei a ni tiin a tarlang. Hei hi UN-in kum 2006 aṭanga NKorea laka ballistic missile leh nuclear programme kalpui leh, ram dang hnenah ralthuam thawn chhuah khapna a siam bawhchhiatna lian tak a ni.
April thla tir khan sanction monitor pathumte chu Ukraine-ah hian zinin, missile themte hian enfiah a, Russia siam a ni lo tih an sawi. Mahse Ukraine thuneitute aṭanga thu an dawn danin, he missile hi Russia ram chhung aṭanga kah chhuah ngei a ni, an ti.
UN-a Russia leh North Korean mission chuan sanction monitor-te report chungchang hi an la chhang lo.
US leh ram dangte chuan Russia-in Ukraine a do hnuah, North Korea hian indona atana hman tur ralthuamte Russia hnenah a pe niin a hmain an puh tawh a, mahse, hei hi ram pahnihte hian an pha thung. Hemi rual hian nikum khan Russia leh North Korea hian an sipaite thawh dunna nghet leh ṭha zawk siam an tiam a ni.