Brazil President-in Covid-19 lockdown sawisel leh

Brazil president Jair Bolsonaro chuan ram hrang hrangten Covid-19 leng thawh hnihna thleng mek vanga inkharkhipna, lock­down a puan leh chu sawisel lehin, thil atthlak tak niin a sawi. 

Bolsonaro hian a hma pawhin hri leng vanga pawn chhuah khap a, khuahkhirhna siam chu a lo sawisel fo tawh a ni. 

President chuan Sao Paulo state-a China siam coronavirus vaccine enchhinna neih mek chu a senso a pe dawn lo tih a sawi bawk. Sao Paulo Governor Jaoa Doria chu an sum senso petu tur zawng turin a ti a, "Sorkar ka ni a, pawisa hi keima thua khawih theih ni loin mipuite ta a ni," tiin China siam vaccine chu a lei dawn lo tih a sawi bawk. 

Health minister-a Sinovca Biotech siam vaccine dose makta­duai 46 lei tura a lo tih pawh President Bolsonaro hian kar liam ta khan a lo hnawlsak tawh a ni. 

Brazil hi US dawta Covid-19 vanga thi tamna ram a ni a, mi 1,59,000 chuangin an thihpui tawh a, hri kai hmuh chhuah hi mi maktaduai 5.5 an tling tawh bawk a, khawvela hri kai tamna ram pathumna a ni mek a ni.