Columbia university-a buaina chhuak a punlun zel

Gaza Strip-a Israel leh Hamas indona thleng mek tihtawp vat duh a, Palestinian thlawptute'n US-a university hrang hranga nawrh an huaihawt mekah Columbia university-ah buaina chhuakin, zirlai nuarte univeristy campus-ah an inkulh a, police-te'n luhchilhin, zirlai nuarte hnawh darh an tum mek zel.

New York khawpuia awm, Columbia university-ah hian Palestinian ṭantu zirlaite hian kar hnih zet nawrh an huaihawt tawh a, hei vang hian New York city Mayor chuan nawrhna chu tihtawp a ṭul tawh thu sawiin, New York city police eng emaw zatin university campus hi an luhchilh a, zirlai tam tak an hreng zui a ni.

Nawrh huaihawtte hian university chhunga Hamilton Hall leh administration building-te chu inkulh nan an hmang a, hemi hma hian kar hnih chhung zet chu campus hung chhungah hian an lo nuar tawh bawk a ni. Police-te hian university building chhunga inkulh zirlaite hi an la la chhuak kim lo.

Columbia university thuneitute chuan nawrh huaihawt zirlai zinga university building-a inkulhte chu hnawhchhuah theih dinhmunah an din thu an sawi. Building-a inkulh mek zirlaite chu boruak ṭha tak hnuaia building chhuahsan tura an ngen hnuah pawh thu an zawm loh avangin an zirna chawlhsan tura an chungthu ngaihtuah tur a nih thu an sawi a ni.

Columbia university hi Gaza-a Israel leh Hamas-te indona duh lohna leh Israel-in Palestinian-te nunna ṭhahnem tak a lak tawh baka indo chawlh a la tum mai loh duh lohna lantir hmasa ber an ni a, anni hnuah hian US-a university leh college tam tak chuan nawrh an huaihawt chhunzawm ve leh a ni. US-ah hian Texas, Utah, Virginia, North Carolina, New Mexico, Connecticut, Louisiana, California leh New Jersey state aṭanga zirlai nawrh huaihawt zingah mi 1,000 chuang police-te hian an man tawh thu an puang bawk. US university hrang hranga zirlai nuarte hian Gaza-a inkahhai puan an phût thu an sawi bakah, Israel nena inzawmna leh sumdawnna hnathawhna ang chi chu tihtawp an phût a ni.