South Korea-in AUKUS-a tel ve a duh

United States, United Kingdom leh Australia te'n an ralthuam neihte inpe tawn tura thawhhona an ziah, AUKUS-a tel ve an duh thu South Korea defence minister, Shin Won-sik chuan a sawi. South Korea leh Australia hian ni hnih awh meeting an nei a, nimin khan a tawp a ni.

Shin chuan,"AUKUS member ramte'n an zinga South Korea tel tura min ngaih pawimawhna hi kan lawm hle a ni. Korea-in hmelma laka inven nana tunlai changkanna leh khawl thil kan neihte hian AUKUS pillar 2 atan a thawh hlawk kan rin bakah, khawvel bakah kan chhehvela remna leh muanna a awm chhunzawm theih nan a ṭangkai hle dawn a ni," a ti.

Kum 2021-a ziah, AUKUS thawhhona kaltlang hian US leh UK chuan Australia hnenah hian China lian zel tur ven leh lo beih let a ṭul huna an beih let theih nan submarine eng emaw zat an hmantir dawn a ni. Heng ram pathumte hian ralthuam inhmantir bakah hian artificial intelligence bakah khawl hmanga inbeihna leh hypersonic system hmanga inpui tawn thei turin AUKUS pillar 2 an ziak leh tawh bawk a ni. South Korea bakah hian Japan pawhin AUKUS pillar 2 an tih zawm tum hian inbiakna an nei ve mek bawk.