Israel PM-in inremna nei pawh ni se Rafah an bei dawn tho tih a sawi

Israel prime minister Benjamin Netanyahu chuan Gaza khawpui chhim lama awm Rafah chu an bei ngei dawn tih Thawhlehni khan a sawi nawn leh. Rafah-a la awm Hamas battalion-te chu nuai chimih an tum tih a sawi a ni.

Israel leh Hamas hian inkahhai puan a nih theihna turin inbiakna an nei mek a, inremna an nei thei a nih chuan Hamas lamin Israel an beih ṭuma an mi man, tun thlenga an la hrente chu an chhuah ang a, Israel lamin Palestinian awmna hmun an awp mekah chhawmdawlna an pe ve thung ang. October 7, 2023-a Hamas-te'n Israel an beih thut ṭum khan mi 253 an man a, an zinga mi 34 vel chu an thi tawh nia hriat a ni a, mi 130 vel la hreng mekin, a bak chu an chhuah tawh a ni.

Hetianga inbiakna neih a nih mek lai hian Netanyahu chuan inremna an nei emaw nei lo emaw pawh ni se Rafah beih an ṭhulh dawn lo tih a sawi. Netanyahu chuan Rafah-a Hamas battalion eng emaw zat la awmte beih chu hnehna pumhlum chan nan a ngai a ni, a ti.

Rafah hi Palestinian helpawl Hamas-te inkhuarna hmun awm chhun a ni tawh a, helai hmuna thuneihna an nei thei a nih chuan Israel lam hian hnehna pumhlum an chang a tih theih ang. Hemi avang hian Israel nationalist party-te chuan an prime minister Netanyahu chu Rafah bei tur hian an nawr reng a ni.

Tun hnaiah inremna zawngin inbiakna neih reng ni mah se, Hamas leh Israel hian inkahhai puang turin inremna an nei thei lo a ni. Gaza mipui mtd 2.3 aṭanga a zahve velin inhumhim nana an pan, Rafah hi Israel-in a bei a nih chuan mipuite tawrhna a nasat dawn em avangin khawvel ram dangte chuan Israel hi Rafah bei lo turin an ngen a, inkahhai puang tura remna an neih theih nan inbiakna neih puiin, inremna siam turin khawvel ram dangte chuan Israel hi an nawr reng bawk. US secretary of state, Antony Blinken chuan tun ṭuma inkahhai puanna atana Israel-in rawtna a siamah hian an inhawngzau hle a ni tiin, an rawtna hi pawm turin Hamas-te chu a ngen.

Netanyahu hian Rafah an beih ngei tur thu sawi mah se, Rafah-a cheng civil mite chu insaseng turin Isarel lamin a la hriattir lo a, mahse, Hamas nena inremna an siam lo a nih chuan, beihpui thlak tura inbuatsaihin civil mite chu hmun him lama insaseng tura a hriattir thuai rin a ni.