Khawiah nge Aung San Suu Kyi an dah?

Myanmar sipaite'n an ram hruaitu an paihthlak tak, Aung San Suu Kyi chu khaw lum lutuk avanga a tanna jail aṭanga sawn chhuah a nih thu sawi mah se, sipai sorkar chuan tun thlengin khawi hmunah nge an dah tih an la sawi lang lo.

Aung San Suu Kyi hi sipaite'n civil sorkar thuneihna an hnehchhuh hnuah hren zui a ni a, thubuai hrang hrang siamsakin, a thubuaiahte hian thiam loh chantir a ni. A chenna ina hun eng emaw chen an hren hnuah, an ram khawpui Naypidaw tan inah dah a ni. Hetih lai hian tun hnaiah Myanmar ram khaw lum lutuk avangin April 16 khan a tanna hmun aṭangin sawn chhuah a ni tih an sawi. Sawn chhuah a nih ni hian Naypidaw-ah hian khaw lum lam hi 40 degree celsius a tling a ni.

Sipai sorkar hian kum 78 mi, Suu Kyi-i tanna hmun sawnsak a ni ngei tih a nemnghet a, mahse, an dahna hmun erawh an sawi chiang duh lo. Sipai thupuangtu chuan khaw lum lutuk avang hian tan ina tang zinga kum upa zawkte tan ruahmanna siamsak an ni a, an sawn zingah hian president paihthlak tak Win Myint pawh a tel nia sawi a ni bawk.

Suu Kyi-i sawnna chungchangah rin thu a tam hle a, Singapore-a news channel CNA chuan tan in aṭang hian lak chhuah a ni lo a, a awmna cell chauh thlaksak a ni, tiin a tarlang. Suu Kyi-i fapa, London-a cheng Kim Aris pawhin a nu awmna tak hi a hriat bik loh thu sawiin, 'tan inah emaw, sipai hotu tu emaw ber inah emaw a ni maithei' tiin, Yangon-a a inah chuan dah a ni lo tih a tarlang. Sipaite chuan a nu an sawnna chhan chu khawngaihna lam aiin, hman ṭangkai an tumna vang zawk nia a rin thu sawiin, sipai hotute hian sipai sorkar dodala beitute'n Naypidaw an hnaih zel chuan a nu hi inphenna atana an hman mai a hlauh thu a sawi.

Tun hnaiah sipai sorkar dodaltu helpawl hrang hrang intel khawmte chuan sipaite hi an bei ngawrh hle a, sipaite kut aṭangin hmun eng emaw zat an laksak tawh bawk. Mahse an ram khawpui erawh sipaite hian an la thunun hneh hle thung.