Gaza Strip-a indo duh lohna lantirtu UCLA-a zirlaite nawrhnaah buaina a chhuak

Gaza Strip-a Israel leh Hamas indo duh lohna lantira United States-a university hrang hrang nawrh huaihawt chu chhunzawm zel niin, University of California, Los Angeles (UCLA)-a Palestinian ṭantu zirlai nuarte inkulhna chu Israel ṭantute'n beiin, buaina a chhuak.

An ram huna Thawhlehni zana UCLA campus-a buaina chhuakah hian campus-a inkulh zirlai nuarte hian an inkulhna chin zauh an tum laiin Israel ṭantute hian an bei niin an sawi a, hemi hnu lawk hian police-te chuan campus an chhuahsan lo a nih chuan man an nih tur thu an hrilh niin an sawi bawk. Mahse zirlaite hian man an hnial lo niin an sawi ve thung.

UCLA professor, Danielle Carr chuan zirlaite chuan nawrh titawpa campus chhuahsan aiin an ṭan hmun an tinghet sauh a, police-te bakah Israel ṭantute aṭang pawhin buaina nasa zawk a chhuak thei tih hriain an inbuatsaih a, man nih an hreh lo bawk a ni, a ti. Buaina chhuak avang hian mi 15-in hliam an tuar a, mi pakhat chu damdawi inah hruai a ni bawk.

UCLA campus-a nawrhna hi tihtawp tumin police-te chuan hmanraw chikim nena thawk chhuakin an bei a, campus hmun tam tak hi fang kualin zirlai nuarte inkulhna chin hi an hual bawk a, zirlai an man theih apiang manin, an mi mante hruai chhuahna tur bus pawh an inchhawp reng a ni.

US-a university tam takah chuan Gaza-a Israel-in Palestine a bei chhunzawm reng duh lohna lantir hian an nuar mek a, tun kar tir khan Columbia university-a nawrh huaihawt zirlai inkulhte chu police-te chuan hnawh darh tumin mi eng emaw zat an lo man tawh bawk a ni. Columbia bakah hian New York khawpuia awm bawk, City college aṭangin zirlai 100 chuang man an ni tawh bawk a ni. Univeristy tam takah nawrh huaihawt a nih avang hian zirlai chhunzawm thei loin hun eng emaw chen an awm phah tawh bawk a ni.