Brazil-a ruah surin chhiatna a thlenah mi 10 thi

Brazil ram chhim lam, Rio Grande do Sul state-ah ruah sur nasa tak avangin mi 10-in nunna an chân tawh a, mi 21 chu chin hriat lohin an awm mek tih Brazil civil defence chuan an sawi.

Ruah sur hian hmun tam takah chhiatna hrang hrang; leimin, tui lian leh lei (bridge) chim a thlen a ni. Ruah sur hi Thawhṭanni aṭanga inṭan tawh niin, vawiin pawh hian a la sur chhunzawm zel rin a nih thu civil defence lam chuan an tarlang.

Thuneitute chuan ruah surin chhiatna a thlenah hian mi 10-in nunna an chân bakah midang 11 hliam tuar an awm mek tih an tarlang. Thlipui tleh leh ruah sur nasa avang hian mi 3,300 chuan an chenna in an chhuahsan a ngaih phah bawk. Khuarel chhiatna thleng avanga mi ṭhenkhat tangkhang leh chhiat tawkte chhan chhuah leh ṭanpui hna chu Brazilian Air Force chuan helicopter pahnih hmangin an thawk mek a ni.

Vice-governor Gabriel Souza chuan hmun kilkhawr leh thliarkar ṭhenkhata mi tang la awmte chhan chhuah chu tun dinhmuna hna pawimawh ber a nih thu sawiin, Nilaini thleng khan thuneitute hnenah chhan chhuak tura ngenna 130 a lut tawh niin a sawi. Souza chuan tuikhuah chim mai hlauhawm pakhat a awm thu sawiin, hemi chheh vela chengte chu hmun him lama thiar chhuah an ni tih a sawi bawk. Brazil National Institute of Meteorology chuan hmun ṭhenkhatah chuan darkar 24 chhungin ruah 150 millimeters chuang a tla hman niin an tarlang.